Heimstad

Bygd: Hovdenakken
Kommune: Molde
Tekst: Hovdenak, Gudmund
Kjelde: Jul i Romsdal 1982 s, 59

Har du sett fjella

når haustdagen hallar

og solbrannen brenn ut i vest?

Har du høyrt vindar

som lokkar og kallar

og spør deg: Kva held du av mest?

Fjellbjørka gulnar

i Horgjaskaret,

og Gud målar Kammen

med gull og med eld.

Eg veit så vel

kva i kveld eg skal svare.

Eg gjev mitt ja-ord

til Horgja i kveld.

Har du sett Skåla

når soldagen bleiknar

og gråstein og lyng blir til gull,

som grånar og kverv

når lysflaumen veiknar,

og månen stig haustblank og full?

Har du sett Romsdal

med skar og med tindar

teikne seg nattsvart

mot blåaste blått?

Eg sender ei takk

med dei lågmælte vindar,

ei takk ifrå meg

som slik heimstad har fått.