Omtale: Vi har ein rik skatt av nynorske songar og salmar. I mest alle norske songbøker finn vi songar av Aasen, Vinje og Garborg, og i salmebøkene (med førti prosent nynorskinnslag) møter vi salmar av Elias Blix, Anders Hovden, Bernt Støylen og andre. I dette programmet får vi presentert eit rikt utval av desse songane og salmane. Terje Aarset fortel om bakgrunnen for tekstene og tonane. Dei mest kjende songane vil publikum få ta del i som allsong. Innimellom vil vi få høyre songar med tilknyting til Romsdal, til tekster/tonar av m.a. Anton Aure (frå Fræna), Brynjulf Salthamar (frå Vestnes) og Bjørn Sæbjørnson (frå Harøya). Desse songane vil sopranen Beate Mordal framføre, akkompagnert av Radmila Stojkovic på piano. Ho vil òg syngje solo på nokre av dei andre songane.

Terje Aarset (f. 1945), frå Årsetdalen, Vartdal. Lærareksamen i Volda 1968, tysk mellomfag ved Noregs lærarhøgskule i Trondheim 1971, norsk hovudfag 1974. Vitskapleg assistent ved Nordisk institutt, Universitetet i Trondheim, 1975–77. Kom til Møre og Romsdal distriktshøgskule, Volda, i 1978. Professor i norsk språk ved Høgskulen i Volda frå 2009 til 2014. Har siste tretti åra særleg arbeidd med Aasen og Aasen-tekster. Gav i åra 1992–2006 ut ti band uprenta Aasen-tekster i Serie A. Skrifter frå Ivar Aasen-selskapet (saman med Jarle Bondevik og Oddvar Nes), og han har gjeve ut fire nyutgåver av Aasen-bøker, m.a. Norsk Ordbog (saman med Kristoffer Kruken, 2003). Aarset har elles redigert og gjeve ut ei rekkje bøker innanfor emna litteratur, bibliografi, lokalhistorie og musikk. Har skrive om lag 70 artiklar om norske (særleg nynorske) songar og salmar. I 2009 gav han ut Den nynorske songskatten, og i 2013 kom Ivar Aasens diktsamling Symra i ny, kommentert utgåve.